Майкрософт корпораци 12 сарын 3-ны өдөр “Shape you future with Azure Data Analytics” дижитал арга хэмжээг зохион байгууллаа. Тус арга хэмжээг Майкрософт корпорацийн гүйцэтгэх захирал Сатъяа Наделла /Satya Nadella/ нээсэн ба тэрээр “2020 он дэлхий нийтийн хувьд сорилтын жил байсан бөгөөд цаашид дата буюу өгөгдлийг байгууллагын стратегийн ач холбогдолтой хөрөнгө гэж авч үзэн, дижитал шилжилтийг яаралтай хийх шаардлагатай болсон байна” гээд Azure Synapse нийтэд нээлттэй болсон талаар дурьдаад, шинээр Azure Purview үйлчилгээг танилцууллаа.

Үүний дараа тус корпорацийн санхүү хариуцсан захирал Ами Хүүд /Amy Hood/ болон Azure хариуцсан дэд ерөнхийлөгч Жулиа Вайт /Julia White/ нар Azure-ын тусламжтайгаар тус корпорацийн дата ямар түвшинд хүрээд байгаа болон энэ хүртэл туулсан замналын талаар ярилцав. Ами Хүүдийн дурдсанаар анх тус корпорацийн хувьд дата буюу өгөдлийн төвлөрөл, хоорондын уялдаа холбоо байхгүй мөн найдвартай бус байсны улмаас ажилтнууд ажлын өдрийн 70%-ийг мэдээлэл олж нэгтгэх буюу гар ажиллагаанд зарцуулагддаг байжээ. Харин одоо нийт 120 дата эх үүсвэрийг Azure-т нэгтгэн, итгэж болохуйц, чанартай өгөгдлийн сан үүсгэсэн ба өдөрт 30,000 орчим хүн тус бүрийн ажлын үүрэгт тохирсон анализ хийх зорилгоор хандаж байна.

Мөн дэд бүтцийг бүхэлд нь клаудруу шилжүүлсэнээр CAPEX зардлыг ихээр хэмнэн, үйл ажиллагааны зардлаа үлэмж хэмжээгээр багасгаснаар бэлэн мөнгөний эргэц сайжирсан байна. Үүнээс гадна Azure analytics ашиглан ирээдүйн таамаглалын хазайлтыг 50% буюу 3-1.5 хүртэл бууруулж, 3 долоо хоногт хийдэг байсан ажлыг 30 минутад хийх боломжтой болсон байна.

Үйл ажиллагааны дараагийн хэсэгт компанийн захирлууд үйл ажиллагаандаа Azure Data Analytic-ыг хэрхэн ашиглаж байгаа талаар ярилцсаныг дор хүргэж байна.

Starbucks

Тус компани өдөр тутмын үйл ажиллагаандаа АI ашиглан салбарын менежерүүдийн шийдвэр гаргалтад шаардлагатай мэдээллийг бэлтгэдэг. Агуулахын системийг бүрэн автоматжуулсанаар салбарууд нөөцөө гараар тоолох шаардлагагүй болж хэрэгцээт бүтээгдэхүүний захилгыг автоматаар хийх боломж бүрдсэн байна. Мөн Covid-19 батлагдсан тохиолдлуудын тоог хэрэглэгчийн зан төлвийн мэдээлэлтэй уялдуулан дүн шинжилгээ хийснээр салбарын менежрүүд дотоод суудлын тоог зохицуулах, drive through, гар утасны аппликейшн эсвэл хүргэлтээр үйлчлүүлэх тоог тооцоолох боломжтой болсон. Мөн гар утасны аппликейшн ашиглан захиалга өгч буй хэрэглэгчидийн худалдан авалтын түүхэд тулгуурлан шинэ бүтээгдэхүүн санал болгох зэргээр хэрэглэгчидэд ойртож ажиллах нөхцөл бүрдсэн байна.

Grab

Grab нь зүүн өмнөд азийн 8 улс, 380 гаруй хотод 200 гаруй сая удаа татагдсан мобайл аппликейшн юм. Өдөр бүр маш их хэмжээний мэдээлэл цуглардаг ба нийт 300 орчим дата аналистууд 30,000 гаруй терабайт дата дээр Azure synapse ашиглан ирээдүйн таамаглал гарган ажилладаг. Covid-19 цар тахлын улмаас хэрэглэгчдийн зан төлөв өөрчлөгдөж байгаа энэ үед зөв өгөгдөлд, цаг тухай бүрт хандаж оновчтой шийдвэр гаргах нь маш чухал юм.

Цаашдаа тус компани хэрэглэгчдийн дата боловсролд хөрөнгө оруулах “Tech for good” төслийг хэрэгжүүлэхээр төлөвлөж байгаа ба 2025 он гэхэд зүүн өмнөд азийн 3 сая гаруй хэрэглэгчийг дата боловсролтой болгохоор зорьж байна. Компанийн дотоод үйл ажиллагааны хувьд Power BI зэрэг аппликейшн ашиглан технологийн бус энгийн ажилтнуудад хэзээ ч хаанаас мэдээлэлд хандан шийдвэр гаргах боломж олгох зорилготой “Data everywhere” хэмээх төслийг хэрэгжүүлж эхлээд байна.

Azure synapse нь /хуучнаар Azure SQL Data Warehouse/

Azure Synapse нь Azure Data warehouse болон аналитикийг нэгтгэсэн хязгааргүй хэмжээний өгөгдөлд анализ хийх үйлчилгээ юм. Azure Synapse болон Power BI-ыг хослуулсанаар өндөр түвшинд таамаглал хийх харин Dynamics 365-тай хослуулсанаар хэрэглэгчийн мэдээллийг бүх талаас нь шинжилж, нэгтгэх боломжтой. Azure Synapse нь бусад ижил төрлийн үйлчилгээтэй харьцуулахад 14 дахин хурдан 94%-иар бага үнэтэй.

Azure Purview

Azure purview нь өгөгдлийн нэгдсэн засаглалыг хангах бүтээгдэхүүн бөгөөд өгөгдөл нь on-premise эсвэл cloud байхаас үл хамааран эх үүсвэрийг тогтоох, ангилах, өгөгдөл тус бүр комплаенсийн шаардлага хангаж байгаа эсэхийг тодорхойлох, удирдах боломжийг олгох юм байна.