Microsoft корпорацийн дараагийн том алхам бол үүлэн тооцооллыг сансрын салбарт нэвтрүүлж буй явдал юм. Сансрын салбарт үйл ажиллагаа эрхэлж буй улсын болон хувийн компаниудын тоо тасралтгүй нэмэгдэж байгаа энэ үед Microsoft корпораци Azure Space-ийн тусламжтайгаар засгийн газар болон газар тариалан, эрчим хүч, цахилгаан холбоо зэрэг салбаруудын хооронд сансрын холболт, тооцооллыг бий болгохоор чадварлаг эрдэмтэд, инженерүүдийн баг бүрдүүлэн ажиллаж байна.
Microsoft корпораци нь сансарт төхөөрөмж хөөргөх симуляци хийх, хиймэл дагуулын цуглуулсан өгөгдлийг задлан шинжлэх зэргийг сансрын салбарын томоохон компаниудтай хамтран гүйцэтгэж байгаа ба дэлхийг хамарсан хиймэл дагуулын холболтын тусламжтайгаар Azure-ийн чадварыг нэмэгдүүлэн, үүлэн тооцооллын илүү өргөн боломжийг хамтрагч болон хэрэглэгчиддээ олгохоор ажиллаж байна.
Дэлхийн хаанаас ч холбогдож болох хурдан, аюулгүй сансрын сүлжээ
Чанартай өгөгдлийн хэрэгцээ, шаардлага нэмэгдэхийн хэрээр найдвартай, бие даасан холболтын сувгийн хэрэгцээ мөн нэмэгдэж байна. Microsoft корпораци нь хуурай газар, усан дор гэх мэт 257500 гаруй километрийг хамарсан оптик сүлжээгээр дэлхийн олон тэрбум хүнийг хооронд нь холбодог боловч хязгаарлагдмал бүс нутагт амьдардаг хэрэглэгчид өгөгдөлд хандах, үелзэлд холбогдоход бэрхшээлтэй байсан хэвээр байна. Тасралтгүй өсөн нэмэгдэж буй сүлжээний хэрэгцээг хангах зорилгоор Microsoft Корпораци сансрын салбарын тэргүүлэгч компаниудтай хамтран ажиллаж эхлээд байгаагийн нэг нь SpaceX юм. Microsoft корпораци SpaceX Starlink-тэй хамтран Azure модуляр дата төвийг өндөр хурдны, тасалдал багатай хиймэл дагуулын өргөн зурвасаар хангахаар ажиллаж байна.
Энэхүү ажлын гол зорилго нь олон орбитын, олон үелзэлийн, олон нийлүүлэгчийн сансрын холболтын шийдлийг нэвтрүүлэх замаар хэрэглэгчдийн хэрэгцээ, шаардлагыг хангах явдал юм. Azure-ын чадварыг найдвартай хиймэл дагуулын холболттой хамтатгаснаар тооцоолол, machine learning, өгөгдлийн шинжилгээ зэргийг өндөр түвшинд хийх боломжтой болж засгийн газар болон хувийн компаниудад шинэ шинэ боломжуудыг нээж өгөх юм.
Бие даасан дата төв /Self-contained data center/
Azure Stack зэрэг үүлэн тооцооллын бүтээгдэхүүний ашиг тусыг хүртсэн компаниуд цөөнгүй бий. Тэгвэл Microsoft корпораци дата төвийг байж болох хамгийн хүнд нөхцөлүүдэд ажиллуулахаар түршиж байгаа ба үүний нэг нь усан доор дата төв байгуулах туршилт буюу Натик төсөл байсан юм.
Энэхүү туршилтын үр дүн болон хэрэглэгчидийн ирүүлсэн мэдээлэл, шаардлагад тулгуурлан Microsoft корпораци шинэ Azure модуляр дата төвийг (MDC) бүтээгээд байна. Энэхүү дата төв нь эрчим хүчний доголдолтой, барилга байгууламжийн нөхцөл тааруу зэрэг хүнд нөхцөлд хэвийн ажиллах чадвартай ба алсагдмал байршилд ажиллах мөн зөөвөрлөх боломжтой юм. Модуляр дата төв нь газрын кабель, бага хэлбэлзлийн сүлжээ, цаашилбал сүлжээгүй нөхцөлд ч хэвийн ажиллах боломжтой. Microsoft болон SATCOM түншлэлийн хүрээнд модуляр дата төдийн хэрэглэгчид Azure-ын найдвартай, өндөр түвшний үйлилгээг хиймэл дагуулын холболтоор дамжуулан авах боломжтой.
Azure Orbital Emulator
Засгийн газар болон сансрын салбарын хувийн компаниуд хамтран олон мянган хиймэл дагуулыг хооронд нь холбох ажлыг эхлүүлээд байгаа ба эдгээрийн сүлжээний холболтыг оновчтой болгох, орбит дээрх үйл ажиллагааг хангахад нарийвчилсан төлөвлөгөө, ахисан түвшний AI-д суурилсан протокол шаардлагатай байгаа юм. Azure Orbit Emulator нь энэхүү хиймэл дагуулуудын нэгдлийг дуураймлаар үүсгэж, хиймэл дагуул зохион бүтээгчидэд AI алгоритм болон хиймэл дагуулын сүлжээг турших, тооцоолох боломж олгож байгаа юм. Аzure нь хиймэл дагуулуудын санах ойгоос урьдчилан цуглуулсан мэдээлэлд дүн шинжилгээ хийх замаар бодит мэт орчинг дуураймлаар бий болгох чадвартай. Azure Orbit Emulator-ыг засгийн газрын хэрэглэгчид үйл ажиллагаандаа аль хэдийн ашиглаж эхлээд байна.